Прво писмо од апостол Јован

Второ писмо од апостол Петар

Прво писмо од апостол Јован Библија од [[]]

Второ писмо од апостол Јован

Глава 1

Вовед

¹Ви пишуваме за Исус Христос, Зборот на животот, Оној што постои уште од самиот почеток. Со свои уши Го слушнавме, со свои очи Го видовме, со свои раце Го допревме.

²Оној што дава живот се појави! Го видовме и подготвени сме да ви сведочиме за тоа. Сакаме да ви кажеме за овој вечен Живот што беше со Небесниот Татко и се појави пред нас. ³Ви го кажуваме она што го видовме и чувме, за да ни се придружите и вие во општењето што го имаме со Таткото и со Неговиот Син, Исус Христос. ⁴Ви го пишуваме ова, за да биде целосна нашата^[1] радост.

Бог е светлина. Да живееме во светлина.

⁵Ова е пораката што ја слушнавме од Исус и ви ја пренесуваме: Бог е светлина. Во Него нема ни трошка темнина.

⁶Ако кажеме дека општиме со Бог, а живееме во темнина, лажеме и не се придржуваме до вистината. ⁷Но ако живееме во светлина, како што и Бог е во светлина, тогаш навистина ќе општиме еден со друг, а крвта на Божјиот Син, Исус ќе нѐ очистува од секој грев.

⁸Ако тврдиме дека не грешиме, самите се лажеме и одбиваме да ја прифатиме вистината. ⁹Но ако Му ги признаваме своите гревови на Бог, Тој е правичен и ќе си го одржи ветувањето: ќе ни ги прости гревовите и ќе нѐ исчисти од сета неправедност.

¹⁰Ако тврдиме дека не сме грешни, Бога Го правиме лажливец и покажуваме дека Неговото Слово не навлегло во нас.

Глава 2

Христос се застапува за нас

¹Чеда Божји, ова ви го пишувам за да не грешите. Но, ако некој од вас направи грев, Го имаме праведниот Исус Христос, Кој се застапува за нас пред Небесниот Татко. ²Тој е помирителната жртва што се принесе за нашите гревови, и не само за нашите, туку и за гревовите на целиот свет.

Одлики на Божјите луѓе

³По што ќе се знае дека сме Божји луѓе? По тоа што ќе се придржуваме до Неговите заповеди! ⁴Оној што тврди дека е Божји човек, а не се придржува до Неговите заповеди, тој лаже и само покажува дека вистината не е во него. ⁵Само тој што се придржува до Неговото Слово има совршена љубов спрема Бог, и по тоа ќе се знае дека сме Божји луѓе. ⁶Оној што тврди дека е Божји човек, треба да го следи примерот на Исус.

⁷Драги мои, јас не ви пишувам за да ви дадам некаква нова заповед. Ова е стара заповед што ви беше дадена уште од самиот почеток. Таа стара заповед - да имаме љубов еден спрема друг - е истата порака што ја чувте отпорано. ⁸Сепак, таа заповед на некој начин е и нова, зашто нејзината вистинска смисла може да се согледа дури сега во Исус и во вас. Погледнете, темнината исчезнува, а вистинската светлина веќе свети!

⁹Оној што тврди дека е на страната на светлината, а ги мрази другите христијани^[2], тој сѐ уште е на страната на темнината. ¹⁰Оној што ги сака другите христијани, навистина живее во светлината и кај него нема ништо што би можело некого да наведе на грев. ¹¹Оној што ги мрази другите христијани е на страната на темнината, низ црна темнина оди и не знае каде ќе стигне, зашто темнината му ги заслепува очите.



¹²Ви пишувам вам, чеда Божји,

бидејќи вашите гревови се простени 

благодарејќи Му на Исус Христос.

¹³Ви пишувам вам, родители,

бидејќи вие Го знаете Христос, 

Оној што постои уште од самиот почеток. 

Ви пишувам вам, млади луѓе, 

бидејќи ја добивте битката против Злиот.

¹⁴Ви напишав вам, деца,

бидејќи вие Го спознавте Таткото. 

Ви напишав вам, родители, 

бидејќи вие Го знаете Христос, 

Оној што постои уште од самиот почеток. 

Ви напишав вам, млади луѓе, 

вие сте силни, зашто 

Божјото Слово живее во вас 

и вие ја добивте битката против Злиот. 

¹⁵Немојте да го сакате овој свет и она што тој ви го нуди, зашто ако го сакате овој свет, во вас нема љубов спрема Небесниот Татко. ¹⁶Тоа што го нуди светот: телесните похоти, желбата да се има сѐ што ќе се види, гордоста заради богатството што се поседува - не е од Небесниот Татко, туку од овој свет. ¹⁷А овој свет и световните похоти се минливи; само оној што ја исполнува Божјата волја останува вечно.

Антихристи

¹⁸Чеда Божји, се одигрува последниот час! Сте слушнале дека ќе дојде Антихристот, но веќе сега има многу антихристи и по тоа знаеме дека настапува последната епоха. ¹⁹Тие луѓе излегоа од нас, но никогаш не беа навистина дел од нас. Да беа навистина дел од нас, со нас и ќе останеа. Напуштајќи нѐ, тие покажаа дека ниту еден од нив не бил дел од нас.

²⁰Но вие сте просветлени^[3] од Светиот Дух и сѐ ви е јасно. ²¹Не ви пушувам како да не ја знаете вистината, туку затоа што ја знаете и знаете дека од вистината не може да произлезе никаква лага. ²²Значи кој е лажливец? Секој што тврди дека Исус не е Месијата! Тие луѓе се антихристи и не Го прифаќаат ниту Небесниот Татко, ниту Синот - Исус. ²³Секој што не го прифаќа Синот покажува дека не го прифаќа ни Таткото. А секој што го признава Синот во исто време Го признава и Таткото.

²⁴Вие, пак, придржувајте се до тоа што го слушнавте на почетокот. Ако се придржувате до тоа што го чувте од почетокот, ќе бидете во единство со Синот и со Таткото. ²⁵А Тој ни вети вечен живот.

²⁶Ова ви го пишувам зашто има луѓе што се обидуваат да ве заведат. ²⁷Што се однесува до вас, вие сте просветлени^[4] од Светиот Дух и, сѐ додека Тој Дух живее во вас, нема потреба никој да ве учи за тоа што е вистина, а што не. Светиот Дух ве учи за сѐ, и сѐ што Тој ве учи е вистина, а не лага. Држете се до Него и до она што Тој ве научи.

Христијаните се Божји деца

²⁸А сега, чеда Божји, останете во единство со Христос, за да не се посрамиме при Неговото повторно доаѓање, туку да излеземе пред Него со крената глава.

²⁹Знаете дека Исус е праведен, затоа треба да знаете дека секој што постапува праведно е Божјо дете^[5].

Глава 3

Како треба да живеат Божјите луѓе

¹Погледнете колкава голема љубов покажа Небесниот Татко спрема нас! Тој толку многу нѐ засака, што нѐ прифати како Свои деца и ние сега навистина сме Божји деца! Световните луѓе не Го познаваат Бога, па затоа и нас не нѐ препознаваат како Божји деца. ²Драги мои, ние веќе сега сме Божји деца, но не можеме ни да си замислиме што ќе станеме допрва! Сепак знаеме дека кога Христос повторно ќе дојде, ќе станеме слични на Него, бидејќи ќе Го видиме онаков каков што Тој навистина е. ³Секој што ја положил својата надеж во Него, ќе се пази да остане чист, токму како што и Христос е чист.

⁴Секој што прави грев, го прекршува Божјиот закон, зашто гревот е токму тоа: прекршување на законот. ⁵Како што знаете, Христос токму заради тоа и дојде: да ги отстрани нашите гревови. Во Него грев нема, ⁶па затоа секој што е на Негова страна нема да продолжи да греши. Ако човек продолжи да греши, тој ниту Го познава Христос, ниту пак сфаќа Кој е Тој!

⁷Чеда Божји, не допуштајте некој да ве заведе! Праведен е оној што постапува праведно, онака како што постапуваше Исус. ⁸А оној што продолжува да греши е на страната на ѓаволот, зашто ѓаволот греши уште од самиот почеток. Токму затоа и дојде Божјиот Син: да го уништи она што го прави ѓаволот.

⁹Тој што е препородено Божјо дете, нема да продолжи да греши, бидејќи Божјото семе е во него. Тој е препородено Божјо дете и не може да продолжи да греши. ¹⁰Постои јасна разлика меѓу Божјите деца и децата на ѓаволот: секој што не постапува праведно, и што не ги сака другите христијани, не е Божјо дете.

Да се сакаме еден со друг

¹¹Пораката што ја чувме од почетокот гласи: да се сакаме еден со друг. ¹²Да не бидеме како Каин, кој застана на страната на Злиот и го уби сопствениот брат. Зошто го уби? Бидејќи она што го правеше Каин беше погрешно, а она што го правеше неговиот брат беше правилно. ¹³Според тоа, не чудете се, драги христијани, ако луѓето од овој свет ве мразат!

¹⁴Ако ние, христијаните, се сакаме еден со друг, тоа докажува дека сме преминале од смрт во вечен живот. Оној што не ги сака другите христијани, сѐ уште е во стегите на смртта.

¹⁵Секој што мрази некој од христијаните е убиец, а вие знаете дека ниту еден убиец во себе нема вечен живот.

¹⁶Кога Исус го даде сопствениот живот за нас, ние сфативме што значи да се има љубов. Така треба и ние да ги даваме нашите животи за други христијани. ¹⁷Како може некој да тврди дека ја има Божјата љубов, ако има световни богатства и гледа дека некој од христијаните е во материјална невола, а тој не сака да му помогне? ¹⁸Чеда Божји, треба вистински да се сакаме, не само на зборови, туку на дело, со нашите постапки во секојдневниот живот.

¹⁹Така ќе знаеме дека сме на страната на вистината, и ќе ја имаме неопходната увереност кога ќе застанеме пред Бог. ²⁰Па и кога нашата совест нѐ обвинува, да не забораваме дека Бог е над нашата совест и дека Тој знае сѐ.

²¹Драги мои, кога имаме чиста совест можеме да пристапиме пред Бог со увереност. ²²Сѐ што ќе побараме од Него, ќе добиеме, ако се држиме до Неговите заповеди и го правиме она што е во согласност со Неговата волја. ²³А Божјата заповед е да веруваме во Неговиот Син Исус Христос и да се сакаме еден со друг. Така ни заповеда и Исус. ²⁴Оние што се придржуваат до Божјите заповеди живеат во нераскинливо заедништво со Бог и Тој трајно живее во нив. Како знаеме дека Бог живее во нас? Доказ за тоа е Светиот Дух што ни го даде Христос.

Глава 4

Вистинскиот и лажниот дух

¹Драги мои, не верувајте му на секој што тврди дека во себе го има Божјиот Дух. Проверувајте дали духот што е во нив е од Бога, бидејќи по светот се појавија многу лажни пророци. ²Вака ќе проверите дали некој во себе го има Божјиот Дух: ако проповеда дека Исус Христос дојде во човечко тело, тој е од Бога. ³Секој што не Му оддава признание на Исус, не е од Бога, туку е од Антихристот. За Антихристот сте слушнале дека ќе дојде. Тој е веќе присутен во светот.

⁴Чеда мои, вие Му припаѓате на Бог и веќе ги победивте овие непријатели. Божјиот Дух што е во вас е посилен од духот што е во световните луѓе. ⁵Тие луѓе му припаѓаат на овој свет. Световно зборуваат и светот ги слуша. ⁶Ние, пак, Му припаѓаме на Бог. Тие што Го знаат Бога, нѐ слушаат, а тие што не се на Божја страна, не нѐ слушаат. Така распознаваме дали некој е со Духот на вистината или со духот на заблудата.

Бог е изворот на љубовта

⁷Драги мои, треба да се сакаме еден со друг, бидејќи љубовта доаѓа од Бог. Секој што ги сака луѓето докажува дека е Божјо дете и дека Го познава Бога. ⁸Оној што не ги сака луѓето докажува дека не Го познава Бога, бидејќи Бог е љубов. ⁹Бог ја докажа Својата голема љубов спрема нас, испраќајки Го на овој свет Својот единствен Син, за ние да добиеме вечен живот преку Него. ¹⁰Тоа е вистинска љубов. Не дека ние го сакавме Бога, туку Бог нас нѐ сакаше и Го даде Својот Син како помирителна жртва за нашите гревови.

¹¹Драги мои, штом Бог покажа толкава љубов спрема нас, и ние треба да се сакаме еден со друг.

¹²Никој никогаш не Го видел Бога, но ако еден со друг се сакаме, покажуваме дека Бог живее во нас и Неговата љубов целосно ќе се искаже преку нас.

¹³Бог ни го даде Својот Дух како доказ дека сме во Него, а Тој во нас. ¹⁴Со свои очи видовме и им сведочиме на луѓето дека Небесниот Татко Го испрати Синот, Исус, да биде Спасител за светот.

¹⁵Секој што го прифаќа Исуса како Божји Син, го има Бога во себе, а и тој е во Бога. ¹⁶Сега знаеме колку многу Бог нѐ сака и имаме доверба во Него.
Бог е љубов! Секој што ги сака луѓето е во единство со Бога, а и Бог е во него. ¹⁷Ако искрено се сакаме и ако живееме онака како што живееше Исус, нема причина да се плашиме од Судниот ден. ¹⁸Љубовта не остава место за страв. Совршената љубов го исклучува стравот, бидејќи стравот подразбира казна, а тој што се плаши нема искрена љубов.

¹⁹Ние возвраќаме со љубов, зашто Бог прв нѐ засака. ²⁰Ако некој тврди дека има љубов спрема Бог, а мрази некој од христијаните^[6], тој е лажливец. Ако не ги сака христијаните, кои му се пред очи, како ќе може да Го сака Бога, Кого не Го има видено? ²¹Христос ни даде ваква заповед: Тој што Го сака Бога, треба да ги сака и христијаните околу себе.

Глава 5

Верата победува

¹Секој што верува дека Исус е Месијата^[7], е препородено Божјо дете. Секој што го сака Родителот, ќе ги сака и Неговите деца. ²По што знаеме дека ги сакаме Божјите деца? По тоа што Го сакаме Бога и ги извршуваме Неговите заповеди. ³Да Го сакаме Бог значи да се придржуваме до Неговите заповеди без тие да ни претставуваат бреме.

⁴Секој што е препородено Божјо дете може да надвладее против светот. Таа победа против светот се постигнува преку вера во Христос. ⁵Кој друг ќе го победи овој свет, ако не оние што веруваат дека Исус е Божјиот Син!?

Тројно сведоштво за Исус

⁶Христос ни беше објавен како Божји Син преку Неговото крштавање во водата и преку пролевањето на Неговата крв на крстот^[8]. Не само преку вода, туку преку вода и крв. Светиот Дух ни сведочи за тоа, а Нему може да Му се верува. ⁷Значи постојат тројца сведоци^[9]: ⁸Духот, водата и крвта, и сведоштвата на сите тројца сведоци се совпаѓаат.

⁹Ако прифаќаме сведочење од човек, Божјото сведоштво е уште посилно. Затоа ние го прифаќаме она што Бог ни го сведочи за Својот Син. ¹⁰Секој што верува во Божјиот Син, го има ова сведоштво во своето срце. Оние што не Му веруваат на Бог, Го прогласуваат Бога за лажливец, бидејќи не Му веруваат на сведоштвото што го даде Тој за Својот Син.

¹¹Сведоштвото кажува дека Бог ни даде вечен живот и тој живот доаѓа од Неговиот Син. ¹²Кој го има Божјиот Син, има вечен живот. Кој го нема Божјиот Син, нема вечен живот.

Одговор на молитви

<бр >
¹³Ова ви го напишав за да знаете дека вие што верувате во името на Божјиот Син имате вечен живот. ¹⁴Заради тоа ние имаме доверба во Бог и знаеме дека кога молиме нешто што е во согласност со Неговата волја, Тој ќе ни го исполни. ¹⁵Знаеме дека кога се молиме Тој нѐ слуша и сигурни сме дека на нашите молитви ќе добиеме одговор.

¹⁶Ако некој од вас гледа дека некој христијанин прави грев што не е за смрт, нека се помоли и Бог ќе му даде живот на оној што згрешил. Ова се однесува на гревови што не се смртоносни. Постои и смртоносен грев и јас не велам дека треба да се молите за оние што го извршиле тој грев. ¹⁷Секоја неправедност е грев, но секој грев не е смртоносен.

¹⁸Знаеме дека ниедно Божјо дете не продолжува постојано да греши, бидејќи Божјиот Син^[10] го чува и ѓаволот не може да допре до него.

¹⁹Ние, христијаните, знаеме дека потекнуваме од Бог, а световните луѓе се под власта на ѓаволот. ²⁰Знаеме и дека Божјиот Син дојде и ни даде разум за да Го препознаеме вистинскиот Бог. Затоа ние сме во единство со вистинскиот Бог и со Неговиот Син, Исус Христос. Тој е вистинскиот Бог, Тој е вечниот живот.

²¹Чеда Божји, чувајте се од идоли^[11]!

Забелешки:

1. Во некои ракописи: вашата.
2. Буквално: браќа.
3. Буквално: вие сте помазани од Светиот.
4. Буквално: примивте помазание.
5. Буквално: е роден од Него.
6. Буквално: а го мрази својот брат.
7. Грчки: Христос.
8. Буквално: Тој дојде преку вода и крв.
9. Некои подоцнежни ракописи додаваат: на небо - Таткото, Зборот и Светиот Дух и тие Тројца се едно. Овде на земјата имаме тројца сведоци.
10. Буквално: бидејќи родениот од Бог... Веројатно се однесува на Христос. Алтернативно, ако се однесува на христијанин, овој стих би гласел: „ ...родениот од Бог се чува себеси и ѓаволот не може да допре до него.“
11. Преносно: од сѐ што може да го истисне Бог од вашите срца, од она што може да ви стане бог наместо вистинскиот Бог.