Писмо од апостол Павле до христијаните во Филипи (вики-превод)

Писмо од апостол Павле до христијаните во Ефес (вики-превод)

Писмо од апостол Павле до христијаните во Филипи Библија (вики-превод) од н.п.

Писмо од апостол Павле до христијаните во Колос (вики-превод)

Глава 1

Авторство и поздрави

¹Од Павле и Тимотеј,
службеници на Исус Христос,
до сите Божји луѓе во Филипи што веруваат во Исус Христос, до старешините^[1] и помошниците^[2] во црквата.

²Бог, нашиот Татко и Господ Исус Христос нека ви бидат благонаклонети и нека ви дадат мир.

Молитва со благодарност

³Секојпат кога ќе помислам на вас, Му се заблагодарувам на мојот Бог ⁴и секогаш со задоволство се молам за вас, ⁵зашто вие ми помагате во ширењето на Радосната вест уште од првиот ден кога ја слушнавте, па сѐ досега. ⁶Сигурен сум дека Бог, Кој ја започна оваа добра работа во вас, ќе продолжи да ја води, сѐ додека не ја заврши, на Денот кога Исус Христос повторно ќе дојде.

⁷Сите сте ми многу драги, и со право ми прираснавте за срце, зашто и вие ја делите со мене оваа привилегија што Бог ми ја даде, сега, кога сум в затвор, како и порано кога бев слободен, да ја бранам и ширам Радосната вест. ⁸Бог ми е сведок дека моите чувства спрема сите вас се искрени и дека ве сакам онака како што ве сака и Исус Христос.

⁹Се молам и вашата љубов еден спрема друг сѐ повеќе да расте, вашето знаење да се продлабочува, и сѐ потемелно да ги разбирате работите, ¹⁰за да знаете да го одберете она што е најдобро. Така, на Денот кога Христос ќе се врати, ќе бидете беспрекорни и чисти. ¹¹Вашите животи ќе бидат исполнети со вистински вредности^[3], какви што само Исус Христос може да создаде, за слава и величање на Бог.

Павле е радосен што се проповеда за Христос

¹²Сакам да знаете, драги пријатели, христијани, дека она што ми се случи, помогна Радосната вест уште поуспешно да се шири. ¹³Целата царска стража во касарната и сите луѓе што се овде дознаа дека сум затворен поради тоа што проповедам за Христос. ¹⁴Мојот престој во затворот кај повеќето христијани ја зацврсти нивната вера во Господ, ги поттикна да бидат посмели и без страв да ја проповедаат Божјата порака.

¹⁵Навистина, некои тоа го прават од завист и од соперништво спрема мене, но другите со најискрени намери проповедаат за Христос. ¹⁶Оние што го прават тоа од љубов знаат дека Бог ме определи да ја бранам Радосната вест. ¹⁷Оние, пак, што проповедаат од ривалство и нечесни мотиви, сакаат да ми ја наголемат болката додека сум в затвор. ¹⁸Но без оглед на тоа дали мотивите се чисти или не, се проповеда за Христос! А јас на тоа се радувам и ќе продолжам да се радувам, ¹⁹бидејќи знам дека преку вашите молитви и со помошта што доаѓа од Духот на Исус Христос сето ова ќе биде за мое избавување.

Да се живее и да се умре за Христос

²⁰Јас најискрено се надевам и посакувам во ништо да не потфрлам, исполнувајќи ја својата должност. Сакам секогаш, а посебно сега, да бидам полн со храброст, и со целото мое битие да Му донесам слава на Христос, било преку мојот живот, или преку мојата смрт. ²¹Што е животот? За мене тоа е Христос! Што е смртта? За мене тоа е чиста добивка! ²²Но ако останам жив ќе можам плодно да работам за Христос. Затоа, кога би требало јас да избирам, не знам што би одбрал. ²³Растргнат сум од овие две желби: да го напуштам овој живот и да бидам со Христос, зашто за мене тоа е далеку подобро, ²⁴или да останам овде, во тело, што би било многу покорисно за вас. ²⁵Со таа увереност ќе останам со сите вас и ќе продолжам да работам, за да напредувате и да се радувате во верата, ²⁶па кога повторно ќе бидам со вас ќе имате уште поголема причина да се гордеете со вашата вера во Исус Христос и со мене.

Однесувајте се како жители на небото

²⁷Трудете се да живеете достојно на Радосната вест на Христос. Без разлика дали сум со вас и можам да видам што правите, или сум отсутен, сакам да слушам само добро за вас: дека еднодушно и сложно се борите за верата што произлегува од Радосната вест. ²⁸Немојте да се плашите од вашите непријатели. Бидете секогаш храбри. Со тоа ќе им покажете дека тие ќе изгубат, а вие ќе бидете спасени, зашто Бог е на ваша страна. ²⁹Дадена ви е привилегијата да Му служите на Христос, не само со тоа што ќе верувате во Него, туку и со тоа што ќе страдате за Него, ³⁰водејќи ја истата борба што ја водев јас, како што и самите видовте, борба што и сега, како што слушате, продолжувам да ја водам.

Глава 2

Единство и скромност

¹Затоа, ако наоѓате охрабрување во фактот дека сте Христови следбеници, ако Неговата љубов ве утешува, ако имате заедништво со Светиот Дух, ако сте чувствителни и сочувствувате еден спрема друг, тогаш ²потрудете се мојата радост да биде целосна со тоа што ќе бидете сложни, ќе се сакате, и здружени ќе се стремите кон една иста цел.

³Немојте да правите ништо од себичност, од ривалство и со цел да се истакнете, туку работете скромно и негувајте повисоко мислење за другите, отколку за себе. ⁴Не гледајте си ги само сопствените интереси, туку грижете се и за потребите на другите. ⁵Размислувајте онака како што размислуваше Исус Христос:



⁶Тој, иако по Својата природа е Бог,

не ја искористи Својата еднаквост со Бог 

за да приграби нешто за Себе.

⁷Напротив, се откажа од тоа и стана слуга,

се роди во човечко тело 

и живееше како човек.

⁸Како човек, Тој се понижи, остана покорен

и по цена на Својот живот, 

и понизно умре распнат на крст.

⁹Затоа Бог Го воздигна и Му даде име

поголемо од секое друго име.

¹⁰Пред тоа име, пред Исус,

сите суштества на колена ќе клекнат: 

небесните, земните и оние под земјата,

¹¹сите отворено ќе признаат дека

Исус Христос е Господ! 

Тоа ќе Му донесе 

слава на Бог Таткото.

Бидете светла во овој свет

¹²Затоа, драги мои, како што бевте послушни додека бев кај вас, уште поважно е да останете послушни и сега, кога сум отсутен. Продолжете да работите, со длабока страхопочит, за да се заокружи вашето спасение, ¹³зашто Бог дејствува во вас, за да ве направи желни и способни да го работите она што Тој го сака.

¹⁴Сѐ што ќе правите, правете без да негодувате или да се расправате, ¹⁵за да бидете беспрекорни и чисти. Меѓу овие расипани, изопачени луѓе вие треба да бидете совршени Божји деца, да светите меѓу нив како што ѕвездите светат на небото, ¹⁶држејќи се цврсто до Пораката што носи живот. Така, кога Христос ќе се врати, јас ќе се гордеам со вас, зашто ќе биде јасно дека моите напори и мојата работа не биле залудни.

¹⁷Вашата вера во Господ и вашето служење се жртва што Му се принесува на Бог. Можеби мојата крв ќе треба да се излее како принос врз таа жртва. Ако биде така, јас ќе бидам среќен и ќе се радувам со сите вас. ¹⁸Така и вие треба да бидете среќни и да се радувате со мене.

Павле го препорачува Тимотеј

¹⁹Ако Му е тоа по волја на Господ Исус, се надевам дека набрзо ќе можам да го пратам кај вас Тимотеј, та кога ќе се врати да ме израдува со вести за вас, ²⁰зашто немам друг истомисленик што толку искрено се грижи за вас. ²¹Сите други работат за своја корист, а не за делото на Исус Христос. ²²Но, тој се има докажано како карактерен човек. Се сеќавате како работевме заедно на ширењето на Радосната вест: како татко и син. ²³Се надевам дека ќе можам да го испратам веднаш штом дознаам каква судбина ми се подготвува, ²⁴а се надевам дека Господ ќе ми овозможи наскоро и јас да дојдам кај вас.

Павле го препорачува Епафродит

²⁵Во меѓувреме, сметав дека е потребно да ви го пратам нашиот брат Епафродит, со кој заедно работевме и се боревме, откако вие ми го испративте да ми помага во разни потреби. ²⁶Тој одвај чека да ве види, копнее да се врати дома, зашто му падна тешко што сте разбрале дека беше болен. ²⁷Навистина беше смртно болен, но Бог му се смилува. И не само нему, туку и мене ми се смилува, за да не ми дојде тага врз тага. ²⁸Брзам да го испратам, за да го видите и да му се нарадувате, па и јас да не бидам толку загрижен за вас. ²⁹Затоа, пречекајте го со радост, како брат во Господ. Таквите како него треба многу да ги цените, ³⁰зашто работејќи за Христос, тој животот си го доведе во опасност и речиси умре, за да ми помогне и да ми го надомести тоа што вие не можевте да го направите за мене, бидејќи сте далеку.

Глава 3

Да се познава Христос е голема придобивка

¹За крај, драги мои, радувајте се што Му припаѓате на Господ. Мене не ми е тешко одново да ви го напишам истото нешто што веќе порано сум ви го пишувал, бидејќи тоа ќе придонесе да се заштитите.

²Чувајте се од тие зли луѓе, од тие кучиња што тврдат дека обрежувањето е неопходно! Тоа е лажна побожност! ³Ние, а не тие, сме обрежани на вистинскиот начин, зашто преку (Светиот) Дух Му служиме на Бог и се гордееме со Исус Христос. Ние не ја полагаме својата вера во телесни вредности. ⁴Јас, се разбира, би можел да се потпрам на телесните вредности. Ако некој мисли дека може да се потпира на телесни вредности, нека знае дека јас имам многу повеќе причини така да мислам. ⁵Обрежан сум кога сум имал осум дена, Израелец сум по раѓање, од племето на Бинјамин - чистокрвен Евреин. Им припаѓав на фарисеите, што подразбира стриктно придржување кон верските закони. ⁶Бев толку ревносен, што дури ги прогонував христијаните^[4]. Толку колку што човек може да биде праведен со почитување на заповедите од верскиот Закон, јас беспрекорно се придржував до нив.

⁷Но сите тие нешта што порано толку многу ми значеа, сега, кога верувам во Христос, ги сметам за безвредни^[5]. ⁸И уште повеќе, сметам дека сѐ е рамно на загуба во споредба со таа скапоцена придобивка: да се познава Исус Христос, мојот Господ. Заради Него се откажав од сите тие телесни вредности и ги сметам за обичен смет. Христос е сѐ што ми треба. ⁹Со Него сакам да бидам, не преку моја сопствена праведност, што би произлегувала од придржување кон верскиот Закон, туку преку праведност што се добива заради вера во Христос, праведност што доаѓа од Бог, врз основа на вера. ¹⁰Сакам длабоко да Го запознаам Христос, да ја доживеам силата што Го воскресна, да искусам дел од Неговите страдања и да се идентификувам со Неговата смрт, ¹¹па така некако да стигнам до воскреснување од мртвите.

Стремеж кон целта

¹²Јас не велам дека веќе сум успеал да го постигнам тоа, или дека сум станал совршен. Но, и понатаму се стремам да ги постигнам целите заради кои Исус Христос ме придоби. ¹³Се разбира, драги пријатели христијани, јас не мислам дека веќе сум успеал да го достигнам тоа^[6], но мислам дека успеав да го заборавам она што е зад мене и од сѐ срце да се стремам кон она што е пред мене. ¹⁴Трчам право кон целта, за да ја добијам наградата, небесното жителство за кое Бог, преку Исус Христос, нѐ повика.

¹⁵Сите што сте духовно зрели, вака треба да размислувате. Ако во нешто не се согласувате, верувам дека Бог тоа ќе ви го разјасни. ¹⁶Но важно е да продолжиме да се придржуваме до вистината што веќе ја прифативме.

¹⁷Драги пријатели христијани, одете по моите стапки. Гледајте на оние што го следат нашиот пример. ¹⁸Многу пати досега сум ви го кажал ова, а и сега, со солзи во очите ќе ви го повторам: има многу луѓе кои според начинот на кој живеат му се непријатели на Христовиот крст^[7]. ¹⁹Тие ќе завршат во пеколот^[8], бидејќи нивните телесни желби^[9] им се бог. Се гордеат со она од што би требало да се срамат и размислуваат само за овоземни работи. ²⁰За разлика од нив, ние сме жители на небото и желно очекуваме нашиот Спасител, Господ Исус Христос, оттаму да дојде. ²¹Тој ќе ги преобрази нашите слаби, смртни тела и ќе ги направи слични на Неговото славно тело, со истата моќ со која ќе ја преземе власта над сѐ.

Глава 4

¹Затоа, мои мили и многу сакани пријатели христијани, по кои толку копнеам, радост моја, гордост моја, останете Му непоколебливо верни на Господ!

Совети и поттик

²Еводија и Синтихија, ве молам обидете се да се усогласите во работата за Господ. ³Те молам и тебе, мој верен соработнику^[10], помогни им. Тие многу работеа со мене на ширењето на Радосната вест, заедно со Климент и со многу други мои соработници чии имиња се запишани во Божјата книга на живите.

⁴Радувајте му се на вашето заедништво со Господ, постојано радувајте се!

⁵Бидете внимателни спрема сите, луѓето по тоа да ве знаат. Господ брзо ќе дојде. ⁶Немојте да се јадосувате за ништо, туку во сите ваши молитви барајте го од Бог она што ви е потребно и бидете благодарни за она што го добивате. ⁷Ако правите така, тогаш Божјиот мир, кој е далеку над она што човек може да го разбере, ќе ги чува вашите срца и умови, поради вашата припадност на Исус Христос.

⁸За крај, мои драги пријатели христијани, стремете се кон она што е вистинито, чесно и праведно; она што е невино, љубезно, на добар глас, вредно и ценето. ⁹Применете го во практика она што го научивте и добивте од мене, било слушајќи ме што зборувам, било гледајќи ме како постапувам, па Бог, Кој е извор на мир, ќе биде со вас.

Благодарност за грижата и помошта

¹⁰Господ ми даде голема радост што по толку долго време вие пак имавте можност да покажете дека се грижите за мене. Не дека престанавте да се грижите за мене, туку немавте можност да го покажете тоа. ¹¹Не го кажувам ова затоа што бев во беда. Се научив да бидам задоволен со тоа што го имам. ¹²Знам како да живеам и во сиромаштија и во изобилие. Ја научив таа тајна, па сега секогаш и секаде сум задоволен, без разлика дали сум сит или гладен, дали имам многу или малку. ¹³Со силата што Христос ми ја дава можам да издржам секакви услови.

¹⁴Сепак, добро сте сториле што сте ми испратиле помош сега, кога ми е тешко. ¹⁵Вие во Филипи, добро знаете дека кога заминав од Македонија, во раните денови на проповедањето на Радосната вест, вие бевте единствената црква што ми помагаше, единствените што го делеа со мене и доброто и злото. ¹⁶Кога бев во Солун, не еднаш ми испраќавте помош, кога таа ми беше потребна. ¹⁷Не барам јас подароци. Само сакам вие да добиете заслужена награда заради вашата грижа.

¹⁸Сега, откако Епафродит ми ги предаде даровите што сте ми ги испратиле, имам сѐ што ми треба, дури и повеќе. Тие се како принос за Бог со прекрасна миризба, жртва прифатлива и пријатна за Него. ¹⁹Со сето Негово огромно богатство, преку Исус Христос, мојот Бог изобилно ќе ја задоволи секоја ваша потреба. ²⁰На нашиот Бог и Татко слава нека Му е довека! Амин.

Завршни поздрави

²¹Поздравете ги сите што искрено веруваат во Исус Христос. Тие се свети луѓе. Ве поздравуваат и браќата што се со мене. ²²Ве поздравуваат сите христијани, а посебно оние што работат во дворецот на императорот.

²³Господ Исус Христос нека ви биде благонаклонет и нека биде со вас^[11].

1. Грчки: ЃепископосЃ.
2. Грчки: ЃдиаконосЃ, ѓакони.
3. Буквално: Ѓсо плодови на праведностаЃ.
4. Буквално: ЃцркватаЃ.
5. Или: ЃСите нешта што би можел да ги сметам за своја предност, сега, кога верувам во Христос, ги сметам за свој недостатокЃ.
6. Според некои ракописи: Ѓјас не сум сѐ она што би требало да бидамЃ.
7. Изразот „Христовиот крст“ овде ја означува Радосната вест, Евангелието, пораката за спасение преку вера во Христос и Неговата жртва во наша полза.
8. Буквално: Ѓкрајот нивни е уништувањеЃ.
9. Буквално: ЃжелудникЃ.
10. Буквално: Ѓоној што е впрегнат во ист јаремЃ.
11. Буквално: Ѓсо вашиот дух.Ѓ