Сефанија (вики-превод)

Хавакук

Сефанија Библија (вики-превод) од н.п.

Хагај

Вики-превод.

Глава 1

Предупредување за уништувањето што следи

¹Збор од ГОСПОД упатен до Сефанија^[1], син на Куши, син на Гедалија, син на Амарија, син на Хезекија, во деновите на Јосија, син на Амон, цар Јудејски. ²<Ќе збришам, ќе збришам сѐ од лицето на земјата!“, вели ГОСПОД. ³<Ќе ги збришам луѓето и животните; ќе ги збришам птиците од небото и рибите од морето, купишта^[2] шут ќе им останат на злите кога ќе ги истребам луѓето од лицето на земјата“, вели ГОСПОД.

Против Јуда

⁴<Ќе ја испружам раката Моја против Јуда и против сите што живеат во Ерусалим и ќе ги искоренам од ова место^[3] остатоците од Баал, имињата на паганските и идолсите свештеници. ⁵На оние што клечат по покривите^[4] пред небесното^[5] воинство, што клечат и се колнат во ГОСПОД, но се колнат и во Малкам^[6]. ⁶Оние што му вртат грб на ГОСПОД и кои ниту Го бараат, ниту се распрашуваат за ГОСПОД. ⁷Молчете пред ГОСПОД Седржителот, оти близу е денот ГОСПОДОВ! ГОСПОД проготви жртва, ги освети оние што ги покани. ⁸На денот на жртвата ГОСПОДОВА, ќе ги казнам кнезовите, царските синови и сите оние кои носат туѓински облеки. ⁹Во тој ден ќе ги казнам и оние кои одбегнуваат да стапнат на прагот^[7], оние кои го исполнуваат храмот на своите богови со насилство и измама. ¹⁰Во тој ден,“ - вели ГОСПОД - „плач ќе се крева од Рибјата порта^[8], лелек од Новата населба^[9] и силен лом од ридовите. ¹¹Лелекајте жители на пазариштето^[10], оти сите трговци ќе бидат збришани, ќе бидат уништени сите што тргуваат со сребро. ¹²Во тоа време, ќе го пребарам Ерусалим со ламби и ќе ги казнам оние кои се самозадоволни, кои се како вински талог, оние што мислат во своите срца: >ГОСПОД нема да направи ниту добро, ниту лошо.' ¹³И ќе бидат оставени нивните богатства за грабеж и куќите нивни за рушење. Ќе градат куќи, но нема да живеат во нив. Ќе садат лозја, но нема да пијат од нивното вино.

Големиот ден ГОСПОДОВ

¹⁴Близу е големиот ден ГОСПОДОВ. Близу е и брзо надоаѓа. Плачот на денот ГОСПОДОВ ќе биде горчлив. Викаат војниците. ¹⁵Ден на гнев е тој ден, ден на несреќа и силна болка, ден на неволја и уништување, ден на темнина и мрак, ден на облаци и црнила. ¹⁶Ден на трубен и боен вик, против утврдените градови, и против аголните кули. ¹⁷Ќе донесе несреќа врз луѓето и ќе одат како слепи, зашто против ГОСПОД грешеа. Ќе бидат излеани крвта нивна како прашина, и цревата нивни како нечистотија. ¹⁸Ниту среброто нивно, ниту златото нивно нема да може да ги спаси, на денот на гневот ГОСПОДОВ. Во огнот на неговата љубомора целиот свет ќе биде обземен; оти Тој ненадејно ќе им стави крај на сите жители на земјата.“

Глава 2

¹Собери се, собери се, народе бесрамен, ²пред да дојде определеното време, а денот се одвејува како плева, пред огената лутина ГОСПОДОВА да падне врз вас, додека не дошол за вас денот на гневот ГОСПОДОВ! ³Барајте го ГОСПОД сите кротки на земјата, кои заповедите Негови ги извршувате! Барајте праведност, барајте скромност! Можеби ќе бидете заштитени на денот на гневот ГОСПОДОВ.

Против Пилистија

⁴Ете, Газа^[11] ќе биде напуштена и Ашкелон во урнатини, Ашдод среде пладне ќе биде испразнет и Екрон ќе биде искоренет. ⁵Тешко на оние што живеат во крајморската земја, Керетитјани^[12], зборот ГОСПОДОВ е против вас. Канаан, земјо на Пилистијците, ете ќе те уништам, ниту еден од тебе нема да остане. ⁶И ќе стане крајморската земја, живеалиштето на Керот^[13], пасишта и трла за овци. ⁷Ќе стане земја што ќе му припаѓа на остатокот на домот Јудин. Во неа ќе наоѓаат пасишта, во домовите на Ашкелон навечер ќе легнуваат. Ќе се грижи за нив ГОСПОД, нивниот Бог и ќе го обнови нивното богатство.

Против Моав и Амон

⁸<Ги чув навредите на „ref> Моав и Амон видете 1 Мој 19:36-38, Ам 1:13.</ref>Моав и подсмевањата на синовите Амонови*, кои го навредуваа Мојот народ, и ѝ се закануваа на нивната земја. ⁹Затоа, жив сум Јас,“ - вели ГОСПОД Семоќен, Бог на Израел, - „ќе стане Моав како „ref> Содом и Гомора 1 Мој 19.</ref>Содом, а синовите Амонови како Гомора*; место на плевел, солена јама и пустош засекогаш! Остатокот од Моите луѓе ќе ги ограбат и преживеаните од Мојот народ ќе ги наследат. ¹⁰Ова им е казна заради гордоста нивна, оти тие го навредуваа и му се потсмеваа на народот на ГОСПОД Семоќен. ¹¹Страотен ќе биде ГОСПОД за нив, кога ќе ги уништи сите богови на земјата. Тогаш ќе Му се поклонуваат народите од сите брегови, секој во својата земја.

Против Куш

¹²И вие Кушити^[14], ќе бидете заклани од Мојот меч^[15]! ¹³Ќе ја протегне раката Своја против север^[16] и ќе ја уништи Асирија, ќе ја остави Нинева^[17] напуштена и сува како пустина. ¹⁴Среде неа ќе лежат стада, глутници од разни животни. Пустинскиот був и вресливата утка ќе дремат на нејзините столбови. Нивното укање ќе одѕвонува низ прозорците. Шут ќе го прекрие прагот, а кедровите греди ќе се соголат. ¹⁵Ете го градот безгрижен, кој живееше во сигурност, оној што си велеше: >Јас сум и нема друг освен мене!'. Каква урнатина тој стана! Легло за дивите ѕверови! Секој што поминува покрај него, се подбива и замавнува со песницата.“

Глава 3

Иднината на Ерусалим

¹<Тешко на градот^[18] бунтовен и развратен, град угнетувачки! ²Не се покорува на никого, не прифаќа исправања. Во ГОСПОД не верува, кон Својот Бог не се приближува. ³Луѓето што се на власт во него - лавови разрикани. Управителите негови - волци во ноќта, ништо не оставаат до утрото. ⁴Пророците негови - луѓе дигноглави и подмолни. Свештениците негови ги сквернават светите нешта, го кршат законот. ⁵Праведен е ГОСПОД среде него, не чини неправда, од утро до утро правдата своја ја дели. Во новиот ден не изневерува. Сепак, неправедниот не знае за срам. ⁶Ги уништив народите, раурнати се тврдините нивни, им ги опустошив улиците, па никој не поминува по нив; разорени се градовите нивни, никој, никој не остана! ⁷Јас реков: >Ќе се плашиш ти од Мене, сигурно! Ќе прифатиш исправање! Тогаш нема да бидат разурнати твоите живеалишта, сите оние кои Јас ќе ги казнам.' Но тие ревносно ги спроведуваа своите расипани дела. ⁸Затоа, чекајте на Мене,“ - вели ГОСПОД - „на денот кога ќе се кренам за плен^[19]. Ете, решив да ги соберам народите, да ги приберам царствата, за да ја излеам врз нив лутината Своја, сета жестина на Мојот гнев. Целиот свет ќе биде проголтан од огнот на Мојата љубоморна лутина. ⁹Тогаш ќе ги променам устите на луѓето, за да бидат чисти, за сите тие да го повикуваат името ГОСПОДОВО и да му служат рамо до рамо. ¹⁰Од зад реките на Куш, поклоници Мои, потомци^[20] на Мојот распрснат народ ќе ми принесуваат жртви. ¹¹На тој ден, нема да бидеш изложен на срам, заради сите грешни дела твои, заради тоа што Ми грешеше, оти тогаш ќе ги отстранам од тебе оние кои се радуваат во гордоста своја и никогаш повеќе нема да бидеш горд на Мојот свет рид. ¹²Ќе ги оставам во тебе луѓето кротки и скромни, кои веруваат во името ГОСПОДОВО. ¹³Остатокот од Израел нема да чини зло и нема да изговара лаги. Нема да се најде во устата нивна јазик измамнички. Ќе јадат, ќе одмараат и никој нема да ги заплашува. ¹⁴Пеј ќерко Сионова! Викни силно Изреле! Радувај се и весели се, со сето свое срце ќерко Ерусалимова! ¹⁵ГОСПОД ја симна од тебе казната твоја, го сврте назад непријателот твој. ГОСПОД, царот на Израел е среде тебе. Никогаш повеќе нема да се плашиш од зло. ¹⁶На тој ден, ќе му биде кажано на Ерусалим: >Не плаши се Сионе, нека не клапнуваат рацете твои! ¹⁷ГОСПОД, твојот Бог е среде тебе! Моќен е Тој и спасува. Ќе ужива во тебе со радост. Ќе те утеши со љубов. Ќе се зарадува над тебе со песна.' ¹⁸Оние^[21] што тагуваат заради празниците^[22], ќе ги отстранам од тебе. Тие се терет и срам за тебе. ¹⁹Гледај, во тоа време ќе се справам со сите твои угнетувачи, ќе ги избавам сакатите, ќе ги приберам распрснатите. Ќе им дадам слава и чест во сите земји каде што беа посрамени. ²⁰Во тоа време, ќе ве приберам. Во тоа време ќе ве вратам дома. Ете, ќе ви дадам чест и слава меѓу сите народи на земјата. Тогаш ќе ги обновам^[23] вашите богатства пред ваши очи“, вели ГОСПОД.

Белешки

1. Сефанија значи ГОСПОД крие, ГОСПОД заштитува.
2. или ќе им го препречам патот на злобните и сосема ќе ги уништам.
3. Ерусалим.
4. Видете 2 Цар 23:12, Јер 19:13
5. Видете 5 Мој 4:15-19, 2 Цар 17:16, 21:3, Иса 47:13
6. или Молех, Амонитски бог. Во обредите често пати жртвувале деца. На Израелците им било забрането да му се поклонуваат на Молех (3 Мој 18:21, 20:1-5). Сепак, Соломон му поставил жртвеник на Маслиновата Гора (1 Цар 11:7), Манасија вовел обреди во долината Бен Хинном (2 Лет 33:6, Јер 7:31, 32:35).
7. Погледнете 1 Сам 5:5.
8. Рибјата порта, во времето на првиот храм била еден од главните влезови во Ерусалим (2 Лет 33:14, Не 3:3). Преку неа трговците носеле риба од Тир или од Галилејското езеро на рибјиот пазар. Била поставена блиску до местото на денешната Порта кон Дамаск.
9. Новата населба, или втората населба, веројатно била областа во Тиропоеонската долина, предградие западно од храмот. Ископувањата покажуваат дека градот во доцниот седми век пр. Хр. се проширил надвор од ѕидините кон запад.
10. Матех, Мортар, веројатно област во Тирополеонската долина, јужно од планината Мориа, место каде што живееле трговците кои доаѓале од други земји.
11. Газа, Ашкелон, Ашдод и Екрон, градови во Пилистија.
12. Керетитјаните и Пелетитјаните учествувале како платени војници во Давидовата војска. Името покажува дека тие можеби се дојдени од островот Крит.
13. Точното значење на овој збор не е познато.
14. Народ од областа на горниот тек на Нил. Од 715 до 663 со Египет владеела Кушитска царска лоза.
15. Веројатно Вавилон.
16. Иако Нинева е на исток од Јудеја, Асирските војски секогаш навлегувале во Канаан од север, одејќи претходно на запад по текот на Еуфрат.
17. Нинева била уништена во 612 г. пр. Хр. што значи дека Сефанија пророкувал пред тој датум.
18. Ерусалим.
19. Вака е во Хебрејскиот текст, а во Септуагинтата и Сирискиот текст е: ќе се кренам да сведочам.
20. Оваа именка е во женски род.
21. Или: Ќе ве приберам сите вас кои тагувате заради празниците, вашиот срам е терет за вас.
22. Празници, видете 5 Мој 23.
23. Или: ќе ги вратам назад вашите заробеници.