Прво писмо од апостол Петар (вики-превод)

Писмо од апостол Јаков (вики-превод)

Прво писмо од апостол Петар Библија (вики-превод) од н.п.

Второ писмо од апостол Петар (вики-превод)

Глава 1

Поздрави

¹Од Петар, апостол на Исус Христос, до луѓето одбрани од Бог што живеат во туѓина, распрснати низ Понт, Галатија, Кападокија, Азија и Витинија. ²Бог Таткото реши да ве одбере, а Неговиот Дух ве направи свети. Вие Го послушавте Исус Христос и сега сте попрскани^[1] со Неговата крв.
Ви посакувам Бог да ви биде изобилно благонаклонет и да ви дава сѐ подлабок мир.

За спасението, некогаш и сега

³Благословен нека е Бог, Таткото на нашиот Господ Исус Христос, Кој поттикнат од Својата огромна милост, одново нѐ роди! Сега живееме со надеж која произлезе од воскресението на Исус Христос. ⁴Очекуваме наследство што не се распаѓа, неосквернето, што не венее. Тоа наследство Бог го чува за нас на небото.

⁵Божјата сила ќе ве чува сѐ до последниот ден^[2], бидејќи имате доверба во Него. Тогаш Бог јавно ќе го објави вашето спасение. ⁶Затоа треба неизмерно да се радувате, макар што, ако е неопходно, уште кратко време ќе минувате низ разни маки и искушенија. ⁷Преку нив се проверува вредноста на вашата вера. Дури и златото, кое е само од привремена полза, со оган се проверува. Вашата вера е многу повредна. Така, ако успешно ја поминете таа проверка, вие ќе добиете пофалба, слава и чест на денот кога Исус Христос ќе Му се открие на целиот свет.

⁸Вие Го сакате Христос, иако никогаш не сте Го виделе, верувате во Него, иако не ви е пред очи. Затоа ќе се радувате со величествена радост што не може да се опише, ⁹оти ќе ја постигнете целта на вашата вера - спасението на своите души.

¹⁰Токму за ова спасение сакаа повеќе да дознаат и пророците. Тие пророкуваа за тој незаслужен подарок што требаше да дојде. ¹¹Се обидуваа да дознаат на кого се однесува тоа и кога ќе се случи. Духот на Христос беше во нив и им претскажуваше дека Месијата најпрво ќе страда, а потоа ќе се стекне со голема слава. ¹²Ним им беше откриено дека ова нема да се случи во нивно време, и дека тие претскажуваат работи за иднината, за вас. Тие работи сега ви беа објавени преку оние што ви ја проповедаа Радосната вест, со силата на Светиот Дух испратен од небото. Дури и ангелите копнеат да проникнат во овие работи, да ги разберат.

Поттик за свет живот

¹³Затоа, впрегнете го својот ум, размислувајте трезвено. Сета своја надеж положете ја во благонаклоноста што ќе ви биде дадена кога ќе се врати Исус Христос! ¹⁴Бидете Му послушни на Бог, бидејќи сте Негови деца. Немојте да им се препуштате на вашите поранешни страсти од времето кога живеевте во незнаење. ¹⁵Напротив, бидете свети во сите свои постапки, бидејќи вие сте Божји избраници, а Тој е свет. ¹⁶Самиот Бог во Светото Писмо ни порачува:
<Бидете свети, затоа што Јас сум свет^[3]!“

¹⁷Кога веќе Бога го сметате за ваш небесен Татко, Кој секого наградува или казнува според постапките, без пристрасности спрема поединци, тогаш, сѐ додека живеете како туѓинци, овде на земјава, однесувајте се со страхопочит спрема Бог. ¹⁸Вие знаете каква цена беше платена за да бидете откупени од безвредниот начин на живеење што го имавте наследено од вашите татковци. Знаете дека не бевте откупени^[4] со сребреници и златници, кои се потрошни нешта, ¹⁹туку со скапоцената крв на Христос, безгрешното, совршено Божјо Јагне. ²⁰Бог Него Го одбра за оваа цел уште пред создавањето на светот, но дури сега, во овие последни времиња, Го испрати на Земјата заради вас. ²¹Преку Христос вие поверувавте во Бог, во Оној што Го воскресна од мртвите и Го прослави. Затоа можете со целосна доверба да ја положите својата надеж во Бог.

²²Сега, откако ѝ се покоривте на вистината, ги исчистивте своите души. Од тоа произлезе искрена, братска љубов меѓу вас. Затоа, сакајте се меѓусебно искрено и од сѐ срце. ²³Сакајте се затоа што сега сте наново родени, не од земни родители, кои би ви ја пренесле и смртта, туку од бесмртниот Родител, преку живиот и вечен Божји Збор. ²⁴Светото писмо вели::

„Секој човек е како трева, 

а секоја човечка слава и убавина 

се како цвеќе во ливада; 

тревата се суши, цвеќето венее,

²⁵само зборот Господов вечно ќе живее^[5].“

Тој збор е Радосната вест што ви беше проповедана.

Глава 2

¹Затоа ослободете се од сѐ што е злобно, немојте да лажете и да лицемерите, немојте да завидувате и да клеветите. ²Бидете како новороденчиња, секогаш жедни за чисто духовно млеко, преку кое ќе растете и ќе се спасите, ³сега кога лично се уверивте дека Господ е добар.

Скапоцен темел и света градба

⁴Дојдете кај Исус Христос. Тој е Живиот Камен, Кој, навистина од луѓето беше отфрлен, но Бог го одбра и за Него е скапоцен. ⁵Сега и вие, како живи камења сте вградени во еден духовен дом, за да бидете свето свештенство, да принесувате духовни жртви прифатливи за Бог, заради Исус Христос. ⁶За ова во Светото Писмо Бог вели:

„Еве, ќе поставам во Ерусалим[6] Камен-темелник, 

одбран и скапоцен, 

кој ќе поверува во Него, 

никогаш нема да се разочара[7].“ 

⁷Да, за вас што верувате:

„Тој Камен што ѕидарите го отфрлија, 

стана камен-темелник[8],“ скапоцен Камен. А за оние што Го отфрлија, истиот тој камен е:

⁸<Камен од кој ќе се сопнуваат,
карпа преку која ќе паѓаат^[9].“
Тие се сопнуваат затоа што не ја слушаат и не ја веруваат Божјата порака. Затоа таква судбина им е определена.

⁹Но вие сте одбрани луѓе, царско свештенство, свет народ, луѓе што Му припаѓаат на Бог. Вие сте избрани за да им ја покажете на луѓето Божјата добрина, зашто Тој ве изведе од темнината и ве воведе во Својата прекрасна светлина.

¹⁰<Вие што порано не бевте сметани за народ,

сега сте Божји народ; 

вие над кои немаше кој да се сожали, 

сега добивте милост од Бога[10].“ 

Живејте примерно

¹¹Драги мои, вие сте привремени жители, туѓинци на оваа земја. Затоа ве молам да не им се препуштате на телесните страсти, зашто тие војуваат против вашите души. ¹²Однесувајте се примерно спрема луѓето кои не Го познаваат Бога. Иако тие ве клеветат дека сте злосторници, кога ќе видат дека вршите добри дела, ќе Го прослават^[11] Бог во денот кога Тој ќе ги посети^[12].

¹³Заради Господ, покорувајте им се на институциите на власта: било на царот, како на врховен владетел, ¹⁴било на управниците назначени од него. Тие се поставени за да ги казнуваат злосторниците, а да ги пофалуваат оние што прават добро.

¹⁵Бог сака со правење добро да ги замолкнете неоснованите обвинувања на неразумните луѓе. ¹⁶Вие не сте робови, туку слободни луѓе, но не треба да ја користите слободата како изговор за да правите зло, туку да живеете служејќи Му на Бог. ¹⁷Почитувајте ги сите луѓе. Сакајте ги христијаните, имајте страхопочит спрема Бог и почитувајте ја власта^[13].

Христос и Неговото страдање нека ви бидат пример

¹⁸Слуги^[14], покорувајте им се со страхопочит на вашите господари, не само на оние што се добри и кротки, туку и на оние што се сурови. ¹⁹Вредно е во Божјите очи ако од обѕири спрема Него трпеливо поднесувате страдања на кои сте неправедно изложени. ²⁰Инаку, зар би било за пофалба, ако трпите заслужена казна!? Но ако правите добро, а сепак страдате, тоа е вредно во Божји очи. ²¹Токму заради ова Бог и ве одбра. Христос страдаше за вас и ви даде пример што треба да го следите.

²²<Грев Тој не направи,

лага не изусти[15].“

²³Кога Го навредуваа,

Тој не им возвраќаше со навреди. 

Кога страдаше, 

Тој не се закануваше, 

туку се препушти во рацете на Бог, 

Кој суди праведно.

²⁴Ги зеде нашите гревови

врз себе, на крстот, за да бидеме, 

мртви за гревот, 

да почнеме да живееме за праведноста. 

Тој доби рани за да бидете вие здрави.

²⁵Талкавте како залутани овци.

Но сега се вративте кај Пастирот, 

кај Оној што се грижи за вашите души.

Глава 3

За сопругите

¹Вие, мажените жени, треба да им се покорувате^[16] на своите сопрузи, дури и ако тие не се однесуваат во согласност со Божјото Слово. Вашето поведение зборува посилно од зборови. Ќе ги придобиете ²преку вашето непорочно и побожно поведение.

³Вашата убавина да не биде само надворешна. Нека не се сведува на дотерување на косата, на накит и скапи облеки. ⁴Треба да зрачите со внатрешна убавина, со кроток и тивок дух, со нераспадлив накит, со она што е скапоцено пред Бог.

⁵Така во минатото се украсуваа светите жени. Имајќи вера во Бог, тие им се покоруваа на своите сопрузи. ⁶Така Сара му се покоруваше на Авраам, нарекувајќи го свој господар. Вие сте сега нејзини ќерки, и ако го правите тоа што е правилно, од ништо не треба да се плашите.

За сопрузите

⁷Вие, мажите треба да бидете внимателни спрема своите сопруги. Тие не се толку силни како што сте вие. Почитувајте ги затоа што и тие, заедно со вас, ќе го наследат Божјиот милостив подарок - вечниот живот. Само така вашите молитви нема да бидат попречувани.

За сите христијани

⁸На крајот, како заклучок, сите бидете сложни, сочувствителни еден спрема друг, сакајте се, бидете љубезни и понизни. ⁹Не враќајте зло за зло, ниту навреда за навреда. Напротив, дури и во такви ситуации бидете љубезни со луѓето и посакајте им добро. Токму заради тоа Бог и ве одбра и тоа е она што Тој го очекува од вас. Така ќе го добиете Неговиот благослов.

¹⁰<Човек што си го сака животот

и сака да доживее многубројни и среќни дни, 

нека си го варди јазикот од зла дума 

и усните од лага,

¹¹Од злото настрана нека се држи

добро нека прави, 

кон мир нека се стреми 

и за мир нека работи.

¹²А Господ бдее над праведниците

и благонаклоно им ги слуша молитвите, 

додека спрема оние што вршат зло 

Господ го упатува Својот прекорен поглед[17].“

Кога страдате неправедно

¹³Ако ревносно правите добро, кој да ви напакости? ¹⁴Па дури и ако страдате, борејќи се за правдата, Господ ќе ве награди. Затоа, немојте да се плашите од нивните закани, не губете си го спокојството. ¹⁵Почитувајте Го Христос од сѐ срце, како свој Господ. Бидете секогаш подготвени да му одговорите на секој што ќе ве праша за вашата христијанска вера^[18]. ¹⁶Одговарајте им на луѓето кротко и со страхопочит. Вашата совест треба да биде чиста. Тогаш оние што зборуваат против вас ќе бидат посрамени од вашето добро поведение, какво што и му прилега на еден следбеник на Христос. ¹⁷Па ако Бог допушти и да страдате, подобро е да страдате поради тоа што вршите добро, отколку да страдате поради зли дела.

¹⁸Па и Христос пострада,

кога умре за нашите гревови, 

еднаш за секогаш. 

Тој беше безгрешен, но умре за нас грешните, 

за да нѐ врати кај Бог. 

Телесно беше убиен, но преку Светиот Дух оживеа[19]. 

¹⁹Тој отиде да им проповеда на духовите што лежат в затвор, ²⁰на оние што долго време во минатото беа непокорни, а Бог трпеливо ги чекаше, на оние што изгинаа во времето на Ное. Тогаш беше направен ковчегот во кој само неколкумина, односно осум души, се спасија од смрт преку водата.

²¹Таа симболика го претставува крштавањето со кое сега сте спасени. Крштавањето не е отстранување на нечистотијата од телото, туку завет пред Бог што се дава со чиста совест. Тоа е сега можно затоа што Исус Христос воскресна.

²²Сега Христос е на небото и седи на почесно место - од десната^[20] страна на Бог. Сите ангели, власти и сили се под Негова контрола.

Глава 4

Поттик на свет живот

¹Кога Христос, додека беше овде на земјата, страдаше, и вие треба да бидете подготвени да страдате. Кога човек ќе умре, престанува да греши. ²Ако „умревте“ со Христос, вие веќе нема да живеете водени од вашите телесни страсти, туку во текот на вашиот овоземен живот ќе ја исполнувате Божјата волја. ³Доволно време потрошивте учествувајќи во она во што уживаат паганите: во неморал, незауздана похота, опивање, гозби, пијанки и одвратно идолопоклонство.

⁴Вашите поранешни пријатели се чудат што вие не сте веќе со нив во тоа море од расипаност, па затоа зборуваат против вас. ⁵Но тие ќе полагаат сметка пред Бог, Кој веќе е подготвен да им суди и на живите и на мртвите. ⁶Токму заради ова, Радосната вест им беше проповедана и на оние што починаа. Иако телесно беа казнети со смрт, тие ќе живеат духовно, како што и Бог живее како дух.

⁷Крајот е близу. Затоа бидете трезвени и ревносно молете се, ⁸а најмногу од сѐ, сакајте се меѓу себе длабоко и искрено, зашто љубовта покрива многу гревови. ⁹Бидете гостољубиви еден спрема друг, без да негодувате.

¹⁰Секој, согласно со дарбите што ги има, нека им служи на другите. На тој начин ќе докажете дека добро управувате со дарбите што ги дава Бог, дарежливо и разновидно. ¹¹Ако е некој добар говорник, нека ја проповеда Божјата порака. Ако некој има дарба да им помага на луѓето, нека го прави тоа со силата што му ја дава Бог. Сѐ треба да се прави така што да Му се оддава слава на Бог, преку Исус Христос, на Кого Му припаѓаат славата и власта во вечни времиња. Амин.

Бидете пример и кога страдате

¹²Драги мои, нека не ве изненадува фактот што минувате низ огнени искушенија, небаре нешто неочекувано ви се случува! ¹³Радувајте се што преку страдањата се поистоветувате со Христос. Затоа, пак, ќе се радувате и веселите кога ќе се открие Неговата слава.

¹⁴Ако ве навредуваат поради тоа што сте Христови следбеници, тоа треба да ве радува! Тоа е доказ дека величествениот Божји Дух е во вас. ¹⁵Срамота е ако некој од вас биде казнет за убиство, за кражба, за злосторство или за правење сплетки, ¹⁶но ако страдате поради тоа што сте христијани, немојте да се срамите. Напротив, бидете Му благодарни^[21] на Бог што го носите Христовото име!

¹⁷Бог веќе почна да суди и тоа најпрво меѓу Своите следбеници. Ако ние, христијаните сме судени, каков ли ќе им биде крајот на оние што ѝ се противат на Божјата Радосна вест!?

¹⁸<Ако праведните одвај се спасуваат,

што ли ќе биде со безбожните и грешните[22]!?“ 

¹⁹Заради тоа, оние што страдаат извршувајќи ја Божјата волја, нека Му ги доверат своите души на својот Творец, Кој никогаш не изневерува, и нека продолжат да прават добро.

Глава 5

Совети за црковните пастори и за младите луѓе

¹Сакам да ги охрабрам црковните старешини. И јас сум старешина, сведок на страдањето на Христос и знам дека кога повторно ќе дојде и мене ќе ме огрее Неговата слава. ²Затоа ве молам, како што овчарот се грижи за своето стадо, така и вие да се грижите за оние што ви се од Бога доверени. Правете го тоа од сѐ срце, а не безволно. Грижете се за нив ревносно, заради Бог, а не од желба за печалба. ³Не господарете над луѓето што ви се доверени, туку бидете му пример на стадото. ⁴А кога ќе дојде Христос, Врховниот Пастир, вие ќе добиете венец што никогаш не свенува - божествена слава.

⁵Вие што сте помлади, слушајте ги старешините. Всушност, сите треба понизно да си помагате еден на друг, зашто:

„Бог на горделивите им се противставува, 

а спрема понизните е благонаклонет[23].“

⁶Бидете понизни пред Божјата моќна рака, за Бог да ве воздигне кога за тоа ќе дојде време. ⁷Сѐ што ве вознемирува препуштете Му го Нему. Тој се грижи за вас.

⁸Бидете трезвени и постојано на штрек! Внимавајте! Вашиот непријател, ѓаволот, како разјарен лав обиколува и си бара жртва за растргнување. ⁹Спротивете му се, без да се колебате во верата. Вие знаете дека христијаните во целиот свет минуваат низ истите страдања! ¹⁰Во Својата љубезност, Бог ве повика, преку Исус Христос, да бидете дел од Неговата вечна слава. Откако кратко време ќе истрпите, Тој ќе ве усоврши, ќе ве поткрепи, ќе ве направи цврсти и непоколебливи. ¹¹Тој владее над сѐ, сега и за вечни времиња. Амин.

Поздрави

¹²Ова кратко писмо ви го пишувам со помош на Силван, кого го сметам за верен брат. Сакав да ве охрабрам и да ве уверам дека ја имате Божјата благонаклоност.

¹³Ве поздравува вашата сестринска црква од Рим^[24].
Ве поздравува и Марко. Тој ми е како син.

¹⁴Поздравете се меѓусебно со искрени изрази^[25] на христијанска љубов.
На сите што сте Христови следбеници ви посакувам мир. (Амин.)

1. (2 Мој 24:3-8, Евр 9:18-21) Мојсеј ги попрскал Евреите со крвта на жртвите за да покаже дека ќе се придржуваат до заветот со Бог. Петар кажува дека крвта на Исус го запечатува заветот меѓу Бог и Неговиот народ.
2. Денот кога Бог ќе им суди на сите луѓе.
3. Цитат од 3 Мојсеева 11:44,45; 19:2; 20:7.
4. Зборот што е употребен во старогрчкиот текст означува откупување на роб или на затвореник.
5. Цитат од Исаија 40:6-8.
6. Во грчкиот текст стои „Сион“ ( поточно е Цион ), што е синоним за Ерусалим, според името на ридот во градот.
7. Иса. 28:16.
8. Пс. 118:22. Всушност се работи за каменот што се ставал на врвот од арката или полутопчестиот свод и на кој се потпирала целата градба. Затоа буквално е наречен „аголен камен“ или „потпорен камен“.
9. Иса. 8:14.
10. Ос. 1:6,9; 2:23.
11. Преносно: ќе поверуваат.
12. Буквално: во денот на посетата.
13. Буквално: царот.
14. Зборот употребен во оригиналот се однесува само на една поповластена категорија на слуги што служеле во домовите на своите господари.
15. Иса. 53:9.
16. Или: да го прифатите авторитетот на своите сопрузи.
17. Псалм 34:12-16.
18. Буквално: надеж.
19. Или: духовно оживеа.
20. Почесно место, резервирано за оној што има моќ да управува во името на царот.
21. Или: Напротив, донесете Му слава на Бог преку името „христијани“.
22. Пог. 11:31.
23. Пог. 3:34.
24. Буквално: Вавилон. Ова најверојатно е симболичко име за градот Рим.
25. Буквално: со бакнеж.