Писмо од апостол Јаков

Писмо до Евреите

Писмо од апостол Јаков Библија од [[]]

Прво писмо од апостол Петар

Глава 1

¹Од Јаков,
слуга на Бог и на нашиот Господ Исус Христос. Поздрав до еврејските христијани од сите дванаесет племиња, распрснати низ целиот свет.

Проверка на верата

²Радувајте се, христијани, кога минувате низ разни искушенија, ³зашто знаете дека колку повеќе вашата вера се проверува, толку поистрајни станувате. ⁴Морате да научите сѐ да издржите, за да станете зрели, целосни и ништо да не ви недостасува.

Молитва со вера

⁵Ако на некој од вас му недостасува мудрост, нека бара од Бог и Тој ќе му даде. Бог е дарежлив спрема сите и не се лути кога бараме нешто од Него. ⁶Но, кога барате, треба да барате со вера, без да се сомневате. Оној што се сомнева е како морски бран што ветрот го носи и го разбива. ⁷Таков човек нека не очекува дека ќе добие нешто од Господ, ⁸бидејќи е неодлучен и непостојан во сѐ.

Сиромаштијата и богатството

⁹Христијаните што се сиромашни треба да се гордеат со својот возвишен позив, ¹⁰а богатите - со понизност. Богатите ќе прецветаат како дивите цветови. ¹¹Ќе огрее жешкото сонце, ќе ја исуши тревата, па дивите цветови ќе се исушат и сета нивна убавина ќе исчезне. Така е и со богатите. Ќе овенат презафатени со она што го работат.

За искушенијата

¹²Благословен е оној човек, што и покрај искушенијата низ кои минува, останува верен. Откако ќе го помине испитот, Бог ќе го награди со вечен живот^[1], како што им вети на сите што Го сакаат.

¹³Никој, кога е во искушеније да направи нешто грешно, нека не вели: „Бог ме искушува со грев!“ Ниту Бог Себеси се проверува со грев, ниту пак вас ве проверува со грев. ¹⁴Секој паѓа во искушение тогаш кога ќе го намамат и ќе го фатат во стапица неговите сопствени, необуздани страсти. ¹⁵Кога необузданата страст ќе се зачне, таа раѓа грев, а растењето на гревот доведува до смрт.

¹⁶Мили мои, не дозволувајте да бидете измамени. ¹⁷Секој добар и совршен дар доаѓа од небото, од Бог, од Оној што ја создал светлината. Кај Него колебање нема. Нема ни трага од некаква промена. ¹⁸Тој сакаше ние да бидеме „ref> Мојсеевиот Закон кажува дека првородените од сите животни и првите плодови од сите растенија Му припаѓаат на Господ.</ref>првина меѓу сите Негови созданија и затоа ни ја испрати вистинската порака, за да ни даде ново раѓање.

Да се слуша и да се спроведува на дело

¹⁹Драги мои пријатели: повеќе слушајте, а помалку зборувајте и воздржувајте се од гневење. ²⁰Гневот не води кон правичност каква што Бог очекува од нас. ²¹Затоа отфрлете ја сета нечистотија и сето зло што е во вас, па понизно прифатете ја пораката што Бог ја посади во вашите срца и што може да ве спаси.

²²Немојте само да слушате и со тоа да се залажувате. Исполнувајте го тоа што ќе го чуете! ²³Тој што слуша, а не исполнува, е како човек што ќе се погледне во огледало, ²⁴и ќе си замине, заборавајќи како изгледа! ²⁵Само оној што ќе се задлабочи во совршениот Закон, законот ослободува, и секогаш ќе се придржува до него, не заборавајќи го она што го слушнал, туку исполнувајќи го, ќе биде благословен од Бог во сѐ што работи.

²⁶Ако се сметаш за побожен, а не го обуздуваш својот јазик, ти само се залажуваш - твојата побожност е безвредна! ²⁷Побожност што Бог, нашиот Татко, ја прифаќа како чиста и непорочна е оваа: Да се грижиш за сирачињата и вдовиците што се во невола и да се одржиш неизвалкан од овој свет.

Глава 2

Против предрасудите

¹Пријатели мои, ако имате вера во нашиот славен Господ Исус Христос, нема да се однесувате спрема едни луѓе подобро, а спрема други полошо. ²Да претпоставиме на вашата богослужба влегува човек со златни прстени на раката, облечен во убава облека, а влегува и сиромашен човек во одрпана облека. ³Ако вие, гледајќи според облеката, му речете на човекот во убава облека: „Седни овде, на убаво место.“ - а на сиромашниот му речете: „Ти стој овде!“, или „Седни на подот!“, ⁴зарем со тоа не ги дискриминирате луѓето, раководејќи се според неправедни мотиви!?

⁵Послушајте ме, драги пријатели! Зарем Бог не ги одбра сиромашните од овој свет да бидат богати во верата и наследници на царството што им го вети на оние што Го сакаат? ⁶А вие ги презирате сиромашните! Кој ве тормози, кој ве влечка по судови? Токму богатите! ⁷Зарем не се богатите тие што го навредуваат Божјото возвишено име што вие го носите?

⁸Добро правите, ако го исполнувате Господовиот царски закон запишан во Светото Писмо: „Сакај го својот ближен колку што се сакаш себеси^[2].“ ⁹Но ако спрема едни луѓе се однесувате подобро, а спрема други полошо, правите грев и според Светото Писмо вие сте престапници.

¹⁰Дури и ако некој се придржува до целиот Закон, а згреши само на едно место, тој е виниовник, како и оној што го прекршува целиот Божји Закон. ¹¹Зашто истиот Бог, Кој рекол: „Не прави прељуба^[3]!“, рекол и: „Не убивај^[4]!“ Ако не си извршил прељуба, а си убил, ти си прекршител на Законот.

¹²Зборувајте и постапувајте како луѓе што ќе бидат судени според милостивиот законот што нѐ ослободува! ¹³Инаку, на Судниот ден Бог нема да има милост спрема оние што биле безмилосни спрема другите. Милоста ја поразува осудата^[5].

Неделотворната вера е бескорисна

¹⁴Драги пријатели, каква корист има да велите дека имате вера, ако тоа не се гледа од вашите постапки? Може ли таква вера да ве спаси? ¹⁵Да претпоставиме дека некој ваш брат или сестра нема доволно облека или храна. ¹⁶Дали е доволно да му кажете: „Оди си спокојно, Господ нека ти даде облека и храна!“, наместо да му го дадете она што му е неоходно за да преживее!? ¹⁷Така е и со верата. Ако не е поткрепена со соодветни постапки, таквата вера е мртва вера.

¹⁸Можеби некој ќе рече: „Некои луѓе имаат вера, а некои - дела.“ Покажете ми, како може да имате вера, а од тоа да не произлегуваат соодветни постапки, а јас, преку моите постапки ќе ви покажам дека имам вера. ¹⁹Вие верувате дека има само еден Бог. Тоа е добро, но дури и демоните веруваат во тоа и се тресат од страв!

²⁰Зар не сакаш да сфатиш, површен човеку, сакаш ли доказ дека од вера без дела нема никаква „ref> Во некои ракописи: вера без дела е мртва.</ref>корист!? ²¹Врз основа на што Бог го прогласи за праведен, нашиот прататко Авраам? Зарем тоа не беше преку дела, кога го стави својот син Исак врз жртвеникот? ²²Гледате ли дека неговата вера беше усогласена со неговите постапки? Со таа своја постапка тој потврди дека има совршена вера. ²³Токму на тоа се мисли кога Светото Писмо вели: „^[6]Авраам Му веруваше на Бог и заради неговата вера Бог го прогласи за праведник“, па го нарече и Свој пријател

²⁴Значи, очигледно е дека човек станува праведен пред Бог преку своите постапки, а не само преку вера. ²⁵Така беше и со блудницата Раав. Бог ја прифати како праведна, зашто таа ги прифати израелските разузнавачи и ги упати на безбеден излез?

²⁶Како што телото без дух е мртво, така и верата без соодветни дела е мртва.

Глава 3

Зауздување на јазикот

¹Драги пријатели, не треба сите да настојуваме да станеме учители во Црквата. Всушност, ние, учителите, ќе бидеме судени построго од другите луѓе. ²Сите ние грешиме во многу работи, но ако умееме да си го зауздаме јазикот, тогаш сме зрели луѓе, па ќе можеме да го зауздаме и целото тело. ³На коњите им ставаме узда во устата, за да ги натераме да ни се покоруваат и да одат онаму каде што ние сакаме. ⁴Земете ги бродовите за пример. Тие се толку големи, а сепак кормиларот со мало кормило ги води онаму каде што сака, и покрај силните ветрови кои ги движат. ⁵Така е и со јазикот. Мал орган е, но голема штета може да направи. Едно жарче може цела шума да запали!

⁶Јазикот е оган, најопасен од сите наши органи. Во состојба е целото тело да го опогани. Јазикот може целиот наш живот да го запали, бидејќи се пали од самиот пекол. ⁷Секое животно, било да е ѕвер, птиците, влекач или од морско животно, се припитомува, или било припитомено од човекот, ⁸но јазикот, ниеден човек не може да го припитоми. Тој е необуздано зло, полн е со смртоносен отров. ⁹Со јазикот Го величаме нашиот Господ и Татко, а со истиот тој јазик ги колнеме луѓето коишто се создадени според Божјо подобие. ¹⁰Од иста уста излегуваат и благослови и клетви. Треба ли, драги мои, така да биде!? ¹¹Може ли од ист извор да извира и слатка и горчлива вода? ¹²Може ли, драги мои, смоквата да раѓа маслинки, а лозата смокви? Не може од солен извор да се црпи слатка вода!

Вистинската мудрост доаѓа од Господ

¹³Има ли меѓу вас мудри и разумни луѓе? Ако има, покажете ја вашата мудрост и разумност со примерен живот, со постапки што ќе се одликуваат со скромност и ќе бидат направени мудро. ¹⁴Но ако вашите срца се полни со чемерна завист и себичност, немојте да се фалите и да се лажете дека сте мудри. ¹⁵Тоа не е небесна мудрост, туку овоземна, себична^[7] и демонска. ¹⁶Кога луѓето се завидливи и себични, создаваат безредие и секакви зли дела. ¹⁷Небесната мудрост нѐ прави чисти, мирољубиви, внимателни, чувствителни, да ги сакаме луѓето и да им помагаме, да бидеме непристрасни и нелицемерни. ¹⁸А миротворците ќе го сеат семето на мирот, и ќе жнеат плодови на праведност.

Глава 4

Пријателството со светот

¹Од каде произлегуваат судирите и кавгите меѓу вас? Зарем не произлегуваат од вашите необуздани страсти што постојано војуваат во вашите тела? ²Го посакувате тоа што го немате и ќе направите сѐ за да го добиете! Подготвени сте дури и да убиете! Ќе пукнете од завист. Се карате, се расправате и пак не го добивате, бидејќи не го барате од Бог. ³А и кога барате - не добивате, бидејќи барате со грешни мотиви, за да ги задоволите вашите необуздани страсти.

⁴Тоа е неверство спрема Бог! Зар не знаете дека пријателството со овој свет значи непријателство со Бог!? Секој што ќе одбере да му биде пријател на овој свет, Му станува непријател на Бог. ⁵Зарем мислите дека Светото Писмо попусто кажува: „Духот што Бог го поставил да живее во нас до ревност копнее за нашата верност кон Него^[8].“ ⁶Всушнот Бог е многу поблагонаклонет спрема нас, како што и кажува Светото Писмо:

=П „Бог им се противставува на гордите, =П но спрема скромните е благонаклонет[9].“

⁷Затоа, дозволете Бог да ве води. Спротивставете му се на ѓаволот, па тој ќе побегне од вас! ⁸Приближете се кон Бог и Тој ќе се приближи кон вас! Грешните луѓе нека си ги измијат рацете, лицемерните нека си ги пречистат срцата. ⁹Нека жалат, нека тагуваат и нека плачат. Наместо да се смеат, нека тагуваат, наместа да се радуваат, нека жалат. ¹⁰Бидете понизни пред Господ и Тој ќе ве издигне!

Предупредување против критизерството

¹¹Пријатели мои, не зборувајте лошо еден против друг! Кој зборува против својот пријател христијанин или го осудува, тој го напаѓа и осудува Божјиот Закон. А ваша задача е да го исполнувате Божјиот Закон, а не да го оценувате! ¹²Само Бог е Законодавец и Судија. Само Тој може да спасува или да уништува. Со кое право ти му судиш на твојот ближен!?

Грешна самоувереност

¹³Слушнете ме сега вие, кои велите: „Денес или утре ќе одиме во тој и тој град и таму една година ќе работиме, ќе тргуваме и ќе заработиме.“ ¹⁴Што знаете вие за утрешниот ден? Од каде знаете дали утре ќе бидете живи? Вашиот живот е како утринската магла: ќе се појави на кратко и набргу исчезнува. ¹⁵Треба да велите: „Ако е Божја волја, ќе бидеме живи и ќе го правиме ова или она.“ ¹⁶Наместо тоа, вие самоуверено се фалите со вашите планови. Лошо е така да се фалите. ¹⁷Секој што не прави добро, иако знае дека треба да прави, греши.

Глава 5

За неправедните богаташи

¹Слушнете ме сега вие што сте богати! Плачете и лелекајте заради многубројните неволи што ве очекуваат! ²Гнило е вашето богатство, вашите облеки молци ги изедоа. ³Вашето сребро и злато 'рѓосаа. Таа 'рѓа ќе биде сведоштво против вас. Ќе ги изеде вашите тела како оган. Сте натрупале богатство во овие последни денови. ⁴Не им плативте на оние што ги косеа вашите ливади и тие неисплатени пари сега викаат против вас, а лелекот на оние што ги жнееја вашите ниви дојдоа до ушите на Семоќниот Господ.

⁵Живеевте раскошно и разуздано на земјата, си ги угоивте телата како стока готова за клање. ⁶Осудувате и убивате праведни луѓе, кои не можеа да ви се спротивстават.

Трпение при страдања

⁷Имајте трпение, драги пријатели, додека чекате да се врати Господ. Погледнете како земјоделецот трпеливо чека скапоцениот плод на земјата да созрее за жетва, како трпеливо го чека пролетниот и есенскиот дожд. ⁸Бидете и вие трпеливи како нив и охрабрете ги вашите срца: Господ брзо ќе дојде! ⁹Немојте да негодувате еден против друг, во спротивно Бог ќе ви суди! Еве Го Судијата, веќе стои пред врата!

¹⁰Драги мои, следете го примерот на пророците што зборуваа во име на Господ. Тие имаа трпение, дури и кога мораа да страдаат. ¹¹Оние што најмногу издржале, најмногу и ги почитуваме. Сте слушнале какво трпение покажа Јов и знаете како Господ на крајот го благослови. Господ е полн со милост и сочувство.

¹²Но пред сѐ, драги пријатели, немојте да се колнете, ни во Небото, ни во Земјата, ниту во било што друго. Доволно е да кажете само „да“ или „не“, за да не паднете под осуда.

Моќта на молитвата

¹³Ако некој меѓу вас е во невола, нека се моли. Ако е весел, нека пее песни на благодарност. ¹⁴Ако некој од вас е болен, нека ги викне старешините на црквата да дојдат и да се молат за него. Нека ги замоли да го помажат со маслиново масло во името на Господ. ¹⁵Ако се молите со вера, ќе му помогнете на болниот. Господ ќе го оздрави и ако направил грев, ќе му прости.

¹⁶Признавајте си ги гревовите еден на друг и молете се еден за друг, за да бидете излечени. Енергична молитвата од праведен човек има голема сила! ¹⁷Илија беше човек од крв и месо, како што сме и ние. Кога тој се помоли да не врне дожд - три и пол години дожд не заврна на земјата. ¹⁸Потоа пак се помоли и заврна дожд, па земјата си ги даде своите плодови.

¹⁹Пријатели мои, христијани, ако некој од вас застрани од вистината, треба да се потрудите да го вратите назад. ²⁰Оној што ќе врати грешник од погрешен пат, ќе ја спаси неговата душа од смрт и ќе покрие многу гревови.

1. Буквално: ќе го прими венецот на животот.
2. 3 Мој. 19:18.
3. 2 Мој. 20:14, 5 Мој. 5:18.
4. 2 Мој. 20:13, 5 Мој. 5:17, Иса. 41:8.
5. Или: Биди милостив, за на Судниот ден Бог да биде милостив спрема тебе.
6. 1 Мој. 15:6.
7. Буквално: душевна, психолошка.
8. Или: Духот што Бог го поставил во нас навистина се грижи за нас.
9. Пог. 3:34.