Зборник на Миладиновци/ Маса плената

Маса плената

од Браќа Миладиновци

на современ македонски правопис

Течит река студена низ стред село Врбјани,
Што налеа реката до две врби китени,
На врбите имаше два одара шарени
На одарот седее до два млади јунаци;
Еден беше Јајо-ага, другиот Весел-ага,
Весел-ага Пиперко, Јајо-ага Пустина.
Турци турски зборвее Маса да је грабеет.
Маса имат два брата главата си давае,
Маса не је давае, им каза на браќа си:
„Море мили братина, Турци турски што
зборвет,
Мене да ме грабеет.” Леле Масо грабеет.
Браќа се зачудие к'де сестра да скријет,
Да не им ја пограбит Весел-ага Пиперко;
Да не им ја однесит во некоја планина,
К'де луѓе да немат. Маса легна да спиет.
Браќа на лов појдое; дури браќа дојдое,
Маса не е најдое. Турци ми је грабнее.