Зборник на Миладиновци/ Желник Пејо

Желник Пејо

од Браќа Миладиновци

на современ македонски правопис

Си овчари вечерале,
Желник Пејо не вечерат;
Си овчари го викаа:
„Ела, Пејо, да вечераш!”
„Ој офчари, мој дружина!
Вечерајте, не чекајте,
Мене ми се не вечерат,
Срце ми се разсвирело,
Ке ми бидет спроти глава,
Ке ми бидит нешто коба.”
Уште речта не изрече,
Се задале арамии,
Го фатиле желник Пеја,
Му врзале бела р'це
Бели р'це на опаку,
Му туриле дробен синџир,
Дробен синџир на грлото,
Го терале со се стадо.